कथा किन ?
मान्छेको भोगाई भन्दा ठुलो साहित्य अरु केहि पनि हुन सक्दैन । ति भोगाइहरुलाई बुन्दै जाँदा तिनीहरु कथा बन्छन् । एक अर्काको कथाले नै हामीलाई जोड्छन् । ति कथाहरुले हामीमा आँट र साहस भर्छन् । अनि हाम्रा कथाहरुले नै हामीलाई यो विपद्को बेलामा एकबद्ध हुन सहयोग गर्छन् । यी र यस्तै विश्वास बोकेका हामी केहि साथीहरुको संयुक्त प्रयास स्वरुप हामीले कथा कोरोना तपाईहरु समक्ष ल्याएका छौं । यो हाम्रो स्वतः स्फुर्त प्रयास हो । आशा गर्छौं, यी कथाहरुले तपार्ईंमा साहस, उर्जा, आत्मियता, समानुभूति र एकताको भावना सृजना गनए सहयोग गर्नेछन् ।
अहिले हामी कोरोना भाइरसको संक्रमणका कारण आइपरेको महाविपत्तीमा छौं । संसारभर लाखौं व्यक्तिहरु यो भाइरसबाट संक्रमित भएका छन् भने हजारौं मान्छेहरुले ज्यान गुमाइसकेका छन् । नेपालमा पनि २०७६ चैत्र २५ गते सम्म नौ जना व्यक्तिहरु संक्रमित भएको खबर छ । संक्रमण नियन्त्रणका लागि सरकारले बन्दाबन्दी (Lockdown) गरेको पनि आज (चैत्र २९) गते १९ दिन भइसक्यो । एक अर्कासंग टाढा बस्नु नै यो संक्रमणबाट बच्ने पहिलो र अचूक ओखती हो ।
विपद् सबैका लागि उस्तै हो । तर यस्ता खाले विपद् र महामारीको ठूलो र गम्भीर असर समाजमा सबैभन्दा पिंधमा पारिएका व्यक्तिहरुमाथि पर्ने गर्दछ । हाम्रो देशमा महिला, विपन्न वर्ग, सिमान्तिकृत, अपांगता भएका व्यक्तिहरु, लैंगिक तथा यौनिक अल्पसंख्यक समुदायका व्यक्तिहरुका साथै भौगोलिक रुपमा विकट ठाउँमा बसोवास गर्नेहरुमाथि यो महामारीको असर धेरै परिरहेको छ । यस महामारीले उनीहरुमाथि पारिरहेको प्रभावसंग जोडिएका कथाहरुलाई यस कथा कोरोना मार्फत बाहिर ल्याउने हामीले कोशिस गरेका हौं। हामीले २०७६ चैत्र २६ गते देखि हरेक दिन यस्ता कथाहरु तपाईंहरु समक्ष ल्याइरहेका छौं ।
कथा कोरोना फेसबुक पेज (https://www.facebook.com/pg/KathaCoronaNepal) लाइक गर्नुहोला । र। हामीलाइ टिव्टरमा पनि @KathaCorona मा फलो गर्नुहोला ।
धन्यवाद।
कथा कोरोना टिम
Connecting people through stories
